Puesii #2 - Filippu Piazzoli

Trois petites nouvelles poésies de Filippu Piazzoli, pour aider à passer le temps et écouter chanter notre langue…

U corbu è a volpe

U corbu chì hà furatu

Un casgiu à u Pentone

Si ne và à Funtanone

Nant’à un peru furcatu.

Ghjustu sottu l’arburinu,

Surtita da la machjeta,

Una volpe si disseta

À pena in lu vaglinu.

Stu magnificu vulpone

Più famitu chè un braccu

Lampa u scherzu d’attaccu :

«  Ancu tù manghji burrone

Cum’è pecure è capre ? »

L’acellu chì prestu vole

Risponde à ste parolle

U so bizzicone apre

È u furmagliu li scappa.

A volpe u chjappa, lesta,

È prima di fà li festa

Dice tuppendu a nappa :

«  O sgiò cumpà stu casgione

Impesta u to lucale !

Pè rispinghje e zinzale

U mi falu in Anghjone. »

Muralità

S’è t’ùn voli avè guai

Cum’è tu tintu corbone

Ùn dà capu à nimu mai

Fendu la to cullazione.

Bastia 1994

Casa sbandunata

U rusulaghju mille fronde

Ammansa pè u terrazzinu.

Resta chjosu lu purtellinu ;

À pichjate nimu risponde.

Ùn orna più celeste sponde

U fumaghjolu cinderinu

Cù lu so fume inguerninu

È le so spire vagabonde.

U stenditoghju senza panni

Rughjinosu i so malanni

Raconta à ogni ventata.

A flora già torna falone

In li vasi di lu scalone

D’ista casa abbandunata.

 Cervioni 2000

U pettirossu

St’accellucciu fuculinu

Saltichjeghja matinale,

À lu sole estivale,

In fondu di lu giardinu.

Ellu face un spuntinu

Achjappendu senza male,

Frà i filari d’urtale,

Vermi è qualchì muschinu.

Ora techju è in tichju,

Cuntentu cum`è un pichju,

A si fischja meludiosu

Pè u so caru rughjone,

Imbuffendu lu piastrone

Russinu è pilacciosu.

Sidossi 1998

Pour lire d'autres poèmes de Filippu Piazzoli : Puesii