Marruchi Sophie - Cincinnassi in l'erba

L’amori supraneghja tutti i sentimi, trimuleghja i corpi, inturbidisci a menti,… ma hè l’amori o ùn saria micca ! Una canzunetta dolci, lebbia lebbia, di Sophie Marruchi.

Cincinnassi in l’erba

Imbriacà di rise u tempu di l’amore

Corre à bracce sparte sopra à i fiori novi

Di u sole di veranu godesi u calore

È cincinnassi in l’erba...

Allisciassi i capelli cun brezze dilicate

Sente u furmiculame chì leia pella è core

Addurmintassi cù u butuleghju di l’ape

È cincinnassi in l’erba...

Lascià daretu à sè u marzu ingrufulitu

Pè a dulcezza languida di u basgiu à l’attrachjata

Quandu d’ottone abbaghja a cullina è u pratu

È cincinnassi in l’erba...

Palisà u sunettu di l’acqua à a surgente

È l’alitu fiuritu d’un mare verdiramu

Scambiassi qualchì rime è ritenele à mente

È cincinnassi in l’erba...

Rimirà à capu in ghjò u celu à baldacchinu

Quandu di pratellina cunvene a strapunta

Fà di u corpu toiu u cuscinu più fidu

È cincinnassi in l’erba...

Sazziassi di a to voce chì canta cristallina

Arpighjàsi e mani sin’à imbulighjalle

Circà cuntinuamente l’armunia più fina

È cincinnassi in l’erba...

À ogni scaccanata fà svulazzà u cantante

Ricacciàne e piume è un suppulu di spera

Abbracciassi à scioglie in l’aria tralucente

È cincinnassi in l’erba...

      Avis aux lecteurs

Entamez un dialogue : écrivez-lui à notre adresse nouveaudecameron@albiana.fr, nous lui transmettrons votre message !