Donne torre

4u di cuprendula

Puru in la corte mirà, ella a si facia valè ! ùn cridite ch’ella

fussi una mollacchera !

S’elli a circavanu più chè più, avia drittu à difende si.

Avertita l’avia, a mamma, quandu, à l’età di cinque anni,

cuminciò a scola :

« S’elli ti cercanu, batti ! Tù, mena forte, mena ! è, in corpu !

chì cusì ùn si lascia tracce. »

Ùn avia avutu tantu ad aspittà per mette in pratica i cunsigli

di a so mamma. Pochi ghjorni dopu, mentre a ricreaziò, dui

grandi li purtonu un zitellu di i so tempi, chì pare ch’ellu ne

fussi innamuratu cecu è a vulissi basgià. A zitella disse innò.

Tandu, azzizzatu da i grandi, u zitellucciu, forte di i so

cinqu’anni, pruvò à inguantalla. Allora a zitella minò. Di tutte

e so forze. In fondu à u corpu. Cum’ella a l’avia incaricata a

mamma. U poveru zitellucciu, falò seccu, seccu. Si vultuliava

pienghjendu in lu pulvericciu. I grandi fighjavanu sturduliti.

Intilata da i pienti, affaccò a maestra. Palisonu i grandi,

quella si fece una scaccanata è sciappittò e mani.

Era compia a ricreaziò.

Dapoi quellu ghjornu, a zitella ùn ebbe più bisognu di minà à

nimu.

« Una vechjuccia sta zitella ! »

L'autore

Nata à l’entre di u 70, Marie-Luce Calligari hè crisciuta in un paese di Castagniccia.

Prufessora di Lettere muderne è cursofona da sempre, marita u so amore di a literatura à quellu, assulutu, di a lingua corsa, in a so vita persunale, prufeziunale è creativa. Indiata in u sviluppu di l’insignamentu bislingu, prupone à i so elevi attelli di scrittura è ghjocu teatrale.

Da zitella scrive versi in lingua corsa è puesie di soiu sò state publicate in varie riviste literarie: «Esse un libru» in  Musanostra #29 o «Asgiu» in L’éphémère 22, A casa di a puisia.

Ghjunghje à a scrittura in prosa in lu 2018 cù «Quella faldetta à farfalle», è vince u premiu Musanostra in lingua corsa 2019 cù «Tigru», una nuvella trà racontu di zitellina è contu fantasticu chì s’affianca à i misteri di u mazzerisimu.